Ek Chota sa Paigaam…!

 

Raah dekh rakhi hai us din ki kabse…

Aage ke sapne sajaa rakhe hain na jaane kabse

Bade utaavle hain yahan se jaane ko

Zindagi ka aglaa padaav paane ko…

 

Par na jaane kyu dil me aaj kuch aur aata hai

Waqt ko rokne ka jee chahta hai

Jin baaton ko lekar rote hain

Aaj un par hasi aati hai

Na jaane kyu aaj…unn palon ki yaad…bohot sataati hai…

 

Kaha karta hu badi mushkil se chaar saal seh jaunga

Par na jaane aaj kyu lagta hai ki kuch peeche reh jayega

Kahi-ankahi, hazaaron baatein reh jayengi

Naa bhulne wali kuch yaadein reh jayengi

Meri taang tab kaun kheecha karega?

Sirf mera sar khane ko, tab kaun mera peecha karega..?

 

Jahan do hazaar ka hisaab nahi hoga,

Wahan do-do rupaye ke liye kaun ladega?

Kaun raat bhar jaag kar saath padhega?

Kaun mera lunch mujhse pooche bina khayega?

Kaun mere naye naye naam banayega…?

 

Mai ab bina matlab ke kisse ladunga?

Bina topic ke kisse faltu me bakwaas karunga?

Kaun phone pe, room par, dilasa dilayega?

Kaun galati se number aane par…galiyaan sunayega?

Cafeteria me Slice…kiske saath piyunga?

Wo haseen pal…kiske saath jiyunga…?

 

Aise dost kahan milenge?

Jo khayi me bhi dhakka de ayein

Aur phir tumhe bachane…khud bhi kood jayein

Meri kahaniyon se pareshan kaun hoga?

Kabhi mujhe har ek ladki se baat karte dekh, hairan kaun hoga..?

 

Kaun kahega, “Manna tere joke pe hassi nahi aati?”

Kiske saath boring lecture jhelunga?

Professor ke PJ pe raakshas ki tarah kaun hasega?

Har chote shart pe haarne wale ki treat…

Iss chakkar me ab kaun fasega?

Mere ‘Dramatics’ ko radhhi kehne ki…himmat kaun karega?

Bina dare sachhi raay dene ki…himmat kaun karega…?

 

Stage par ab kiske saath jaunga?

Juniors ko faltu ke lecture kaise sunaunga?

Achanak,  bina matlab ke, kisiko bhi dekh kar, pagalon ki tarah hasna

Na jaane yeh…phir kab hoga?

Keh do doston…dubara sab hoga…?

 

Doston ke liye Professors se kab lad payenge?

Kya ye din phir se aa payenge?

Raat ko 3 baje Maggi khane kaun jayega?

Uncle Sam’s pe pel ke khane ki shart kaun lagaega?

Kaun mujhe meri kabiliyat par bharosa dilayega?

Aur zyada uddne par, zameen pe layega…?

 

Meri khushi me sach me khush kaun hoga?

Mere gham me mujhse zyada dukhi kaun hoga?

Meri ye kavita kaun padhega?

Kaun isse sach me samjhega?

Bohot kuch likhna…abhi baaki hai

Kuch saath…shayad abhi baki hai…

 

Bas ek baat se darr lagta hai doston…

Hum ajnabee na ban jaye doston

Zindagi ke rangon me, dosti ka rang pheeka na pad jaye

Kahin aisa na ho, doosre rishton ki bheed me, dosti dum tod jaye

Zindagi me milne ki fariyaad karte rehna

Agar na mil sake, to kam se kam yaad…karte rehna…

 

Chahe jitna hass lo aaj mujh par

Mai bura nahi maanunga

Iss hasi ko apne dil me basaa lunga

Aur jab yaad aayegi tumhari

Yehi hasi lekar, thoda muskura lunga…

 

Abhimanyu hai mera naam

Aur ye tha mere doston ke liye

Ek chota sa paigaam…!